yaas mein jab kabhii aansuu niklaa
ik nayeii aas kaa pehluu niklaa.....
lay urdii sabza-e-Khoodroo ki mahek
phir terii yaad kaa pehloo niklaa
meethii bolii mein papiihay boley
gungunaataa hu’aa jab tuu niklaa
aayein saavan kii andherii raatein
kahein taaraa, kahein jugnuu niklaa
naye mazmoon sujhaatii hay sabaa
kyaa idhar se vo mushk-buu niklaa
paanv chhilney lagii jaltii hueii rait
dasht se jab ko’ei aahoo niklaa
kaei din raat safar mein guzrey
aaj tau chaand lab-e-juu niklaa
taaq-e-maiKhaanaa mein chaahii thii amaaN
vo bhii teraa Kham-e-abruu niklaa
ehl-e-dil sair-e-chaman se bhii gaye
aks-e-gul saayaa-e-gesuu niklaa
vaaqiyaa ye hay ke badnaam huye
baat itnii thii keh aansuu niklaa
No comments:
Post a Comment