Ikk Khalq-e-Khuda Terey Baad

Dasht-e-Hijran Mein Saya Na Sada, Terey Baad
Kitney Tanha Hain Terey Aabla-Paa, Terey Baad

Lab Pay Ikk Harf-e-Talab Tha, Na Raha Terey Baad
Dil Mein Taseer Ki Khwahish Na Dua Terey Baad

Aik Hum Hain Ke Hain Be-barg-o-Nawa Terey Baad
Warna Aabad Hai Ikk Khalq-e-Khuda Terey Baad

Ikk Qayamat Ki Khirashein Mairey Chehrey Pay Sajeen
Ikk Mehshar Mairey Andar Say Utha Terey Baad

Tu Ke Simta To Rag-e-Jaan Ki Hadon Mein Simta
Main Ke Bikhra Tu Sameita Na Gaya Terey Baad

Yeh Alag Baat Ke Afshaan Na Huwa Tu Warna
Mainey Kitna Tujhey Mehsoos Kiya Terey Baad

Mairi Dukhti Huyi Aankhon Say Gawahi Lena
Mainey Socha Tujhey Apney Say Siwa Terey Baad??

Seh Liya Dil Ne Terey Baad Malaamat Ka Azaab
Warna Chubti Hai Rag-e-Jaan Mein Hawa Terey Baad