aflaaq ka saaya hay jo kuch hay zameen par hay
hay khuwaab kaheen mera, tabeer kaheen par hay
kuch aisi nazar daali hangaam-e-widaa uss ne
main khud tou chala aaya, dil ab bhi waheen pe hay
ae fikr-e-samaa'wati, ae taaer-e-lahoti!
parwaaz se kya haasil jo kuch hay zameen par hay
"mojood" mein rehnay se "aainda" nahi milta
asbaat ka har jalwa moqoof "nahi" par hay
uss lamhay k jadoo se phir waqt nahi nikla
jo cheez jahan par thi, wo cheez waheen par hay
chahay tu yunhi rakhay, chahay tu sahar kar dae
iss raat ka mustaqbil uss maa_jabeen par hay
iss umr ki fursat mein har cheez ka hona hay
janat bi yaheen hongi! dozakh jo yaheen par hay
No comments:
Post a Comment