Karte raho

Karte raho shiqwe meri tanhaayi ke,
Maarte raho patthar apni khuddari se,
Siwaa bikharte kaanch ke tukdon ke,
Ab tumhe yahaan aur kuchh na milegaa...

Jin shabdon ki tumhe talaash hai,
Main unhe kabhie kaa mitaa chukaa hoon...
Qaid kar iss gale me apni aawaaz ko,
Main hameshaa ke liye dafanaa chukaa hoon...

Nahi, woh ehsaas ab nahi rahe,
Woh jazbaat badal chuke hain,
Mere dil ke aage na haath failaao,
Ab mere jeene ke andaaz badal chuke hain...

Patakte raho sar inn deewaron pe,
Fenkate raho kankar inn kinaaron se,
Siwaa aakar laut jaati lehron ke,
Ab tumhe yahaan aur kuchh na milegaa....

Karte raho shiqwe meri tanhaayi ke,
Maarte raho pathar apni khuddari se,
Siwaa bikharte kaanch ke tukdon ke,
Ab tumhe yahaan aur kuchh na milegaa....