Abhi kuch bhi nahi badla

Abhi kuch bhi nahi badla
Darakhtoon per wohi mausam abhi tuk muskaratey hain

Abhi tuk surmaii shaamien hamarey saath roti hain

Abhi tuk meri aankhoon main tumharey khuaab hunstey hain

Abhi tuk meray haathoon per tumhari ungaliyoN ki naram porooN se likhey sub harf zinda hain

Abhi tuk meray seeney main tumhari saans chalti hai

Abhi tou raastoon per doodhiyaa pairoon se parney waley
Saarey naqsh qaaiem hain

Abhi almaariyon main saarey tuhfey gungunaatey hain

Tumharey khut abhi bhi raat ki tanhaaii main mujh se
Tumhari baat kertay hain

Bohat se saal guzrey hain, bohat sa waqt beeta hai

Meri chahat nahi beeti, meri himmat nahi guzri
Abhi kuch bhi nahi badla, abhi kuch bhi nahi badla

Ager chaho, ager samjho, meri maano
Tou lout aao!